Efiopiyanın Oromiya əyalətində təhlükəsizlik qüvvələrinin nümayişçilərə atəş açması nəticəsində çoxlu sayda insan ölüb və yaralanıb.

Axar.az xəbər verir ki, Oromo qəbiləsinin təşkil etdiyi milli bayram şənliyində hökumət əleyhinə şüarların səsləndirilməsindən sonra polis nümayişə müdaxilə edib. 100 mindən çox nümayişçini dağıtmaq üçün gözyaşardıcı qazdan istifadə edilib. Toqquşmadan qaçan minlərlə nümayişçi özünü gölə atıb.

Hökumət qaynaqları ilkin olaraq 52 nəfərin həyatını itirdiyini açıqlayıb. Fəallar isə 300 nəfərin öldüyünü, çoxsaylı insanın isə yaralandığını iddia edib.

Qeyd edək ki, Efiopiya hökumətinin ötən il Oromiya əyalətində aqrar əraziləri ekspropriasiya edərək paytaxt ərazisini genişləndirməyə çalışması nəticəsində 2015-ci ilin dekabr ayından 2016-cı ilin avqust ayına qədər hökumət əleyhinə etiraz aksiyaları təşkil edilib. Rəsmi məlumatlara görə, bu etirazlar nəticəsindən 200 nəfər həyatını itirib. Beynəlxalq insan haqları təşkilatları isə ölənlərin sayının daha çox olduğunu iddia edir.