Ukrayna PUA-lardan kütləvi şəkildə istifadə etməklə Rusiyanı hazırlıqsız yaxaladı. Lakin görünür ki, dünyada heç kim bu səviyyədə olan təhlükəyə hazır deyil.

Axar.az xəbər verir ki, bu barədə amerikalı analitik Çak Devor “Foks Nyus” nəşrində dərc olunann məqaləsində bildirib.

O qeyd edib ki, Rusiya Ukrayna xəstəxanalarına və yaşayış binalarına müntəzəm olaraq raket və dronlarla zərbələr endirməyə davam edir. Bu cür hücumlar yüksək hərbi effektivliyə malik deyil və daha çox İkinci Dünya müharibəsi zamanı Almaniyanın Böyük Britaniya şəhərlərinə endirdiyi bənzər zərbələri, yəni mülki əhalini qorxutmaq kampaniyasını xatırladır.

Məlumata görə, bu hücumlar Ukraynanın müqavimətini qırmayıb, əksinə, Kiyevin mübarizəni davam etdirmək əzmini daha da gücləndirib.

Lakin ruslardan fərqli olaraq, ukraynalılar sistemli şəkildə hərbi-sənaye obyektlərinə - yanacaq karvanlarına, sursat anbarlarına, dəmir yolu qovşaqlarına və körpülərə zərbələr endirirlər. Bu isə cənub istiqamətində Rusiya qoşunlarının təchizatını əhəmiyyətli dərəcədə çətinləşdirib.

Bundan əlavə, Ukrayna Rusiya neftinin ixracı üçün istifadə olunan "kölgə donanması" adlandırılan gəmilərə də hücum edir.

Devorun fikrincə, Ukraynanın zərbələri nəticəsində Rusiyanın üzləşdiyi hazırkı problemlər ABŞ üçün xəbərdarlıq olmalıdır.

ABŞ Hərbi Dəniz Qüvvələri, o cümlədən təyyarədaşıyan gəmilər həm havadan, həm də dənizdən həyata keçirilən kütləvi dron hücumlarına qarşı həssas olaraq qalır. Həmçinin ABŞ-ın aviabazaları, enerji sistemi və digər kritik əhəmiyyətli infrastrukturu da hələ də lazımi səviyyədə qorunmur.

"Qarşı tərəflər belə "dron sürüləri"ni Kubadan və ya Meksikadan, yaxud da sahil yaxınlığında hərəkət edən Çin ticarət gəmilərindən buraxa bilərlər. ABŞ bu qorunma üsulunu tez bir zamanda mənimsəməlidir. Alternativ yol isə bu həqiqətləri öz acı təcrübəsi hesabına öyrənməkdir", - deyə analitik xəbərdarlıq edib.