ABŞ-ın Rusiyaya qarşı sanksiyalar məsələsində atdığı addımlar Kremlin mövqelərini gücləndirir və Ukraynaya qarşı müharibənin sülh yolu ilə həlli perspektivini uzaqlaşdırır.

Axar.az xəbər verir ki, bu barədə Fransanın “Le Monde” nəşri yazıb.

Nəşr qeyd edir ki, Vaşinqtonla Moskva arasında münasibətlərin istiləşməsinin əsas təzahürlərindən biri Rusiya dizel yanacağının ABŞ bazarına tədarükü barədə razılaşma olub. Oktyabrın 23-də 40 min ton yanacaq daşıyan ilk tanker Finlandiya körfəzindən Nyu Yorka yola düşüb. Bu tədarükün ABŞ-da yanacaq qiymətlərinə ciddi təsir göstərməsi ehtimalı azdır, lakin mühüm siyasi əhəmiyyət daşıyır.

“Dizel yanacağı ilə bağlı razılaşmanın gözlənilən iqtisadi faydanı gətirib-gətirməyəcəyinin əhəmiyyəti yoxdur. Əsas məsələ bu xəbərin özünün yaratdığı təsirdir”, – deyə Yeni Avrasiya Strategiyaları Mərkəzinin baş elmi işçisi Sergey Aleksaşenko bildirib.

Onun sözlərinə görə, Kreml Donald Tramp administrasiyası ilə yaxınlaşmanı ABŞ və Avropa arasındakı fikir ayrılıqlarının dərinləşməsinin təsdiqi kimi qiymətləndirir:

“Eyni zamanda, tərəflər Amerika şirkətlərinin Rusiya neft sektoruna qayıtmasını, Saxalin yaxınlığında karbohidrogen hasilatı üzrə birgə layihələri, eləcə də Rusiyanın “Lukoyl” şirkətinin beynəlxalq aktivlərinin Ağ evlə əlaqəli investorlar tərəfindən mümkün satın alınmasını müzakirə edirlər.

Digər təşəbbüslər arasında ABŞ aviaşirkətlərinin Rusiya hava məkanına çıxış əldə etməsi, titan tədarükü sahəsində əməkdaşlıq və “Şimal axını” vasitəsilə Avropaya qaz tədarükünün bərpası da var. Bununla belə, bu layihələrin bir hissəsinin həyata keçirilməsi Qərbin sanksiyalarının ləğvindən asılıdır”.