Gürcüstan Avropa Komissiyasını ölkənin daxili işlərinə müdaxilədə ittiham edib.

Axar.az xəbər verir ki, bu barədə Gürcüstan Xarici İşlər Nazirliyi Avropa Birliyinin Tiflisin üzvlük prosesini dayandırmasına cavab olaraq bildirib.

“Sənəddə faktiki qeyri-dəqiqliklərə və yanlış qiymətləndirmələrə yol verilib, həmçinin antigürcüstan narrativlərinin yayılmasına şərait yaradılıb. AK-nın ölkənin tərəqqisini obyektiv qiymətləndirmək imkanları elə Avropa Birliyinin özü tərəfindən məhdudlaşdırılıb. Xüsusilə, hesabat dövründə Brüssel Assosiasiya Sazişi çərçivəsində Tiflislə heç bir səviyyədə görüş keçirməyib”, - məlumatda deyilib.

Gürcüstan XİN AK-nı seçmə təhlil aparmaqda və hüquqi məsələləri siyasiləşdirməkdə ittiham edərək, bunu qanunun aliliyi prinsipinin pozulması və ölkənin daxili işlərinə açıq müdaxilə cəhdi kimi qiymətləndirib.

Qeyd edək ki, Gürcüstanın Avropa Birliyinə üzvlük prosesi faktiki olaraq dayanıb.