Fransa Müdafiə Nazirliyinin Silahlanma üzrə Baş İdarəsi (DGA) yeni nəsil hərbi müşahidə peyklərinin hazırlanmasını “Airbus Defence and Space” və “Thales Alenia Space” şirkətlərinə həvalə edib.

Axar.az xəbər verir ki, bu barədə Fransa Silahlı Qüvvələr Nazirliyi məlumat yayıb.

Məlumata görə, dəyəri 1,5 milyard avrodan artıq olan müqavilə çərçivəsində hazırlanacaq iki İRİS (kosmik kəşfiyyat və təsvir sistemləri) peyki 2035-ci ilədək mövcud üç CSO peykini əvəz edəcək.

Bildirilib ki, İRİS proqramı çərçivəsində yaradılacaq peyklər ölkənin kosmosdan optik kəşfiyyat imkanlarını gücləndirəcək.

Hazırda istifadə olunan üç CSO peyki 2018, 2020 və 2025-ci illərdə orbitə buraxılıb. Yeni İRİS sistemi isə Fransaya kosmosdan görüntü əsaslı kəşfiyyat məlumatları əldə etmək imkanını qoruyub saxlamaqla yanaşı, görüntülərin keyfiyyətini və onların əldə olunma sürətini əhəmiyyətli dərəcədə yaxşılaşdırmalıdır.