Əbu-Dabidə MMA döyüşçüləri arasında insident yaşanıb.

Axar.az Globalinfo.az-a istinadən xəbər verir ki, gürcüstanlı keçmiş UFC çempionu Merab Dvalişvili rusiyalı döyüşçü Usman Nurməhəmmədov və onun ətrafındakı şəxslərin hücumuna məruz qaldığını iddia edib.

MMA döyüşçüsü İliya Topuriya hadisəyə münasibət bildirərək sosial şəbəkə hesabında insidentin görüntülərini paylaşıb.

O, Usman Nurməhəmmədovun və yanında olan şəxslərin BƏƏ hüquq-mühafizə orqanları tərəfindən saxlanıldığını da iddia edib. Lakin saxlanılma barədə məlumat hələlik rəsmi şəkildə təsdiqlənməyib.

Topuriya paylaşımında hadisə iştirakçılarını sərt şəkildə tənqid edib:

“Deyilənə görə, Usman yanında olan qorxaqlarla birlikdə saxlanılıb. Bunlar təvazökarlıq və hörmət haqqında danışmağa cəsarət edən insanlardır? Bu, utancvericidir. Siz sadəcə qorxaqlardan ibarət bir dəstəsiniz. Mən sizi həmişə orta səviyyəli insanlar hesab etmişəm. İndi isə bütün şübhələri aradan qaldırdınız”.

Məlumata görə, insident noyabrın 11-də Əbu-Dabidə, RAF turniri öncəsi media tədbiri zamanı otellərdən birinin foyesində baş verib. Dvalişvili onun və dostunun təxminən 20 nəfərlik qrupun hücumuna məruz qaldığını bildirib.