Rusiya Böyük Britaniyanın nüvə arsenalından digər Avropa ölkələrinin müdafiəsi məqsədilə istifadə etmək imkanından imtina etməsini tələb edir.

Axar.az xəbər verir ki, bu barədə “Teleqrаf” nəşri yazıb.

Nəşr qeyd edir ki, bu təklif Rusiyanın danışıqlar qrupunun Ukraynada müharibənin dayandırılması ilə bağlı müzakirələr üçün hazırladığı tələblər siyahısına daxil edilib.

Xatırladılır ki, Böyük Britaniya NATO-nun kollektiv müdafiəsi çərçivəsində nüvə silahı daşıyan sualtı qayıqlardan istifadə edən yeganə Avropa ölkəsidir. Böyük Britaniyanın Baş naziri Endi Börnhem isə bu yaxınlarda qitənin təhlükəsizliyinin Rusiya ilə müzakirə mövzusu ola bilməyəcəyini bəyan edib.

Sənəddə, həmçinin Qərb ölkələrinin Ukraynaya silah, hərbi texnika və digər hərbi təyinatlı məhsulların tədarükünü dayandırması, eləcə də Ukraynanın NATO-ya üzvlüyü perspektivinin istisna edilməsi tələb olunur.

Nəşrin məlumatına görə, Moskva müharibə başa çatdıqdan sonra da Ukraynanın işğal olunmuş əraziləri üzərində nəzarəti saxlamaq niyyətindədir. Bunun müqabilində Rusiya Ukraynanın Avropa Birliyinə üzvlüyünü dəstəkləyə bilər. Lakin bunun üçün Kiyevin AB-nin ümumi müdafiə siyasətindən kənarda qalması şərtini irəli sürür.