Ukraynanın Moldovadakı fövqəladə və səlahiyyətli səfiri Sergey Pirojkovun qondarma Dnestryanı qurumun rəhbərliyinə göndərdiyi məktub Rusiya rəsmi dairələrini özündən çıxarıb.

"Axar.az"ın Ukrayna mediasına istinadən verdiyi məlumata görə, ruslar bu məktubu o qədər emosiya ilə qarşılayıb ki, hətta Rusiya Baş nazirinin müavini Dmitri Roqozin səfirin ünvanına nalayiq ifadələr işlətməkdən belə çəkinməyib. Rus rəsmisi dipomatı "it oğlu" adlandırıb.

Qeyd edək ki, məktubda son zamanlar Ukrayna sərhədlərindən təxribatçı qrupların keçməsi barədə xatırlatma yer alıb. Əlavə olunur ki, Dnestryanı bölgə sərhəddə yerləşdiyindən buraxılış-keçid məntəqəsi ciddi iş rejiminə keçib. Bu üzdən səfir qondarma qurumun məsələyə anlayışla yanaşmasını istəyib.

Rusları özündən çıxaran məqam isə, ukraynalı səfirin ifadələrində Dnestryanı bölgəni dönə-dönə qondarma qurum adlandırması və bütün olayları yalnız rəsmi Kişinyovla razılaşdıracağını dilə gətirməsi olub. Bəzi rusiyalı ekspertlər isə məsələyə emosional reaksiya verərək, bu bölgənin də müstəqilliyinin vaxtının çatdığına işarə edib.