İsrail əsgərləri gecə təşkil etdiyi basqınlarla fələstinli uşaqları qanunsuz şəkildə həbs edir.

"Axar.az" bu barədə türk mətbuatına istinadən xəbər verir. İsrail həbsxanalarında təkkameralı hücrələrə atılan uşaqlar psixoloji zərbə alırlar. Avropa-Aralıq dənizi İnsan Haqları Komissiyasının İsrail ordusunun fələstinli uşaqları həbs etməsi ilə bağlı hazırladığı hesabatda son iki ildə həbslərin 80% artdığı bildirilib.

İnsan Haqları Komissiyasının tərtib etdiyi hesabatda keçən iki ay ərzində İsrail əsgərlərinin 740 fələstinli uşağı həbs etdiyi yazılıb. Həbs olunan uşaqların yarısı ən azı 1 həftə İsrail həbsxanalarında saxlanılır.

Uşaqların həbs olunmasının səbəbi kimi İsrail əleyhinə olan aksiya və mitinqlərə qatılmalarını göstərən İsrail uşaqların gözünü qorxudaraq onları əzməyi planlaşdırır. Aksiya və mitinqlərə qatılmaq nə beynəlxalq, nə də milli konstitusiya görə cinayət sayılmır.

Gecə yarısı həbs olunurlar

Uşaqlarda qalıcı psixoloji travmaların yaradılması və ailələrinin narahat olması üçün həbslərin hamısı gecə saatlarında həyata keçirilir. Uşaqlar İsrail həbsxanalarına aparılar-aparılmaz təkkameralı otaqlara salınırlar. Bu da onların psixologiyasına ağır zərbə vurur.

İsrail əsgərləri tərəfindən həbs olunan bəzi uşaqlar istintaq əsnasında ciddi təzyiqlərə məruz qaldıqlarını bildiriblər. Uşaqları tualetə getməkdən, yemək yeməkdən məhrum edən İsrail əsgərləri uşaqları təhqir etməkdən, vurmaqdan da çəkinmir.