Brüssel Serbiyadan Avropa Birliyinə girmək üçün Rusiya-Serbiya Humanitar Mərkəzinin bağlanılmasını tələb edir.

Axar.az xəbər verir ki, bunu “Sputnik” agentliyinə müsahibəsində Rusiya Xarici İşlər naziri Sergey Lavrov söyləyib.

“Avropa Birliyi Niş şəhərindəki humanitar mərkəzimizə casus yuvası kimi baxır. Onların fikrincə, bu yer AB-nin təhlükəsizliyinə təhdiddir. Bizə bəllidir ki, Brüssel Serbiyadan Avropa Birliyinə girmək üçün Rusiya-Serbiya Humanitar Mərkəzinin bağlanılmasını tələb edir. AB istəyir ki, Serbiya da Monteneqronun rəhbəri (Monteneqronun Baş naziri Milo Cukanoviç nəzərdə tutulur – red.) kimi Rusiyaya xəyanət etsin. Halbuki Moskva Monteneqro rəhbərinə heç nə etməmişdi”, – deyə o bildirib.

Lavrov Avropa Birliyinin siyasi münasibətlərini başqalarına qarşı mübarizə üstündə qurduğunu bildirib:

“Biz isə heç kimlə başqa bir tərəfə qarşı mübarizə üçün dostluq qurmuruq. Moskva bu siyasətini Balkanlardakı qonşuları ilə də təkrarlayır”.

Qeyd edək ki, Nişedəki Rusiya-Serbiya Humanitar Mərkəzi 2012-ci ildə yaradılıb. Mərkəzin əsas məqsədi ölkədəki fövqəladə vəziyyət və texnoloji fəlakətlər zamanı fəaliyyət göstərməkdir. Qərb ölkələri bu mərkəzi indiyə qədər gizli Rusiya bazası hesab edirlər. Buna görə Avropa Birliyi onun bağlanmasına çalışır. Maraqlı məqam orasıdır ki, mərkəz NATO-nun Kosovadakı hərbi bazasının 100 kilometrliyində yerləşir. Üstəlik, bu ərazidən "Türk axını" kəmərinin keçməsi gözlənilir.