2005-ci ildə Qırğızıstanda baş tutan inqilabı mən maliyyələşdirmişəm.

Axar.az xəbər verir ki, bunu Fransa mətbuatına müsahibəsində qazaxıstanlı bankir Muxtar Ablyazov söyləyib.

“2005-ci ildə mən Qırğızıstanda hakimiyyət dəyişikliyinin baş verməsi üçün müxalifəti maliyyələşdirirdim. Bu mənim üçün çox vacib idi. İstəyirdim postsovet respublikalarından birində demokratik proseslər başlasın”, – deyə o bildirib.

Qeyd edək ki, Ablyazov 2013-cü ildə Fransada həbs olunub. O, BTA bankın maliyyə vasitələrinin ələ keçirilməsində günahkar hesab edilir. Rəsmi Astana Ablyazovun fəaliyyəti sayəsində banka 6 milyard dollar ziyan vurulduğunu bildirib. Qazaxıstan bundan öncə Ablyazovu ekstradisiya etməyə çalışsa da, Paris buna izn verməyib.

2005-ci ildə Qırğızıstanda “Zanbaq inqilabı” baş verib. Nəticədə o dövrün prezidenti Əsgər Akayev hakimiyyətdən devrilib. Akayev sonradan ailəsi ilə birgə Rusiyaya qaçıb. Akayevin yerinə hakimiyyətə Kurmanbek Bakıyev gəlib. Lakin 2010-cu ildə o da sələfinin taleyini yaşamalı olub.