ABŞ hökumətindəki üç anonim qaynaq “Röyter” agentliyinə Rusiya Prezidenti Vladimir Putinin bu ilin payızında ABŞ-da keçirilən seçkilərə müdaxilə etməsi barədə məlumat verib.

Axar.az xəbər verir ki, qaynaqlar Putinin seçkilər zamanı kiber hücumları şəxsən nəzarətdə saxladığını iddia edib.

Məlumata görə, kiber hücum əvvəlcə ümumi xarakter daşıyıb:

“Hər şey bir cəhd kimi başlanıb. Məqsəd Amerika demokratiyasının artıq “etimada layiq olmadığını” göstərməkmiş. Amma zamanla bu cəhd prezidentliyə digər namizəd Hillari Klintonun çatışmazlıqlarının ifşa kampanıyasına çevrildi. Ruslar Respublikaçılara aid qurumların da elektron ünvanlarını sındırıb, amma əldə edilən məlumatlara heç bir diqqət yetirilməyib.

Üzü payıza doğru hakerlərin səyləri Donald Trampa yardım cəhdlərinə çevrilib. Putin əmin idi ki, özəlliklə iqtisadi sanksiyalarla bağlı məsələlərdə Tramp özünü Rusiya ilə daha dostca aparacaq”.

Rəsmi Kreml isə okeanın o tayında keçirilən seçkilərə müdaxilə barədə ünvanına söylənilənləri inkar edir. Bununla belə, Ağ Evin yüksək vəzifəli nümayəndəsi Ben Rodes açıqlamasında Rusiya prezidentini birbaşa suçlamasa da, Putinin kiber hücumlardan xəbərdar olduğunu bildirib:

“Düşünmürəm ki, Rusiya hökumətində bu miqyasda olay Putindən xəbərsiz baş versin. Söhbət bu qədər iri miqyasda təşkil olunmuş kiber təcavüzdən getdiyi zaman hər şey hakimiyyətin yuxarı dairələrində çözülür”.