İraq hökuməti Səddam Hüseynin hakimiyyəti dövründə qanunsuz ələ keçirilən türkman torpaqlarını geri qaytarmaq istəmir.

Axar.az xəbər verir ki, bu barədə İraq Türkman Cəbhəsi (İTC) sədrinin müavini, Kərkük millət vəkili Həsən Turan keçirdiyi mətbuat konfransında məlumat verib.

Onun sözlərinə görə, Bağdad rəhbərliyi bölgədə demoqrafik dəyişikliklər etmək fikrindədir:

“Səddam Hüseyn dövründə türkmanlardan alınan hektarlarla torpağın həqiqi sahiblərinə verilməməsinin səbəbini indi anlayırıq. Onlar bu şəhərin kimliyini ancaq bu yolla dəyişdirəcəklərini düşünürlər. İraqın müxtəlif bölgələrindən gələn qaçqınlar Kərkük ətrafında yerləşdirilir.

Hazırda Səddam Hüseyn siyasəti davam etdirilir. Bu ərazilərin türkmanlara qaytarılması üçün 13 il davam edən hüquqi mübarizə çərçivəsində 55 min məhkəmə işində yalnız barmaqla sayıla biləcək nəticələr əldə olunub. Təəssüf ki, bu ölkədə siyasi tərəflər hüququ da nəzarət altına alıblar”.