Azərbaycandan olan bir neçə şəxs İrkutskda 70-dən artıq insanın ölümünə səbəb olan spirt tərkibli mayedən ("Boyarışnik") kütləvi zəhərlənmə işi ilə bağlı saxlanılıb.

Report xəbər verir ki, bu barədə İrkutsk şəhəri Leninski rayon məhkəməsinin sədri bildirib. Onun sözlərinə görə, saxlanılanlar arasında spirt tərkibli maye satan köşklərin sahibləri, satıcılar - əsasən uşaqlı qadınlar, əvvəllər məhkum olunmayan şəxslər, hətta sürücülər də var.

“Lakin bir nəfər də istehsalçı yoxdur", - o qeyd edib.

Saxlanılanlarda iki Azərbaycan vətəndaşı məhkəmənin qərarı ilə ev dustaqlığına buraxılıb. Ümumilikdə məhkəmə doqquz şübhəli şəxs barəsində qərar qəbul etmək niyyətindədir.