Türkiyə parlamentinin çevriliş cəhdini araşdıran komissiya 15 iyul hadisələri ilə bağlı hazırladığı hesabatı tamamlayıb.

Axar.az xəbər verir ki, 936 səhifəlik hesabatda FETÖ-nun ABŞ rəhbərliyi ilə qeyri-rəsmi əlaqələr qurduğu, hətta ABŞ Prezidenti Barak Obamanın Keniyadakı qohumlarının FETÖ məktəblərində təhsil aldığı əks olunub.

Hesabatda təşkilatın son 8 ildə dünyanın 160 ölkəsində güclü şəbəkə yaratdığı bildirilib:

“Bu müddətdə ABŞ ilə münasibətlər əvvəlki illərlə müqayisədə daha da güclənib - təşkilatın ABŞ-dakı məktəblərinin sayı sürətlə artıb, külli miqdarda maliyyə vəsaiti cəlb edilib.

ABŞ rəhbərliyi ilə münasibətlərin qurulması üçün xeyli vəsait xərclənib, seçki kampaniyalarında yaxından dəstək göstərilib.

FETÖ-nun 2007-ci ildən İstanbul imamı, bundan əvvəl isə Keniya üzrə nümayəndəsi olan Əhməd Qara Barak Obamanın andiçmə mərasiminə dəvət olunub.

Obama prezidentliyə namizəd olduqdan sonra birbaşa Fətullah Gülən Qaraya göstəri verərək gələcək prezidentin Keniyadakı qohum-əqrabası ilə maraqlanmasını tapşırıb.

Bundan sonra Obamanın Afrikadakı qohumları FETÖ məktəblərinə ödənişsiz qəbul olunub”.