Ölkəmizin təhlükəsizliyini qorumaq üçün başqa hərbi əməliyyatlara başlaya bilərik.

Axar.az xəbər verir ki, bunu Türkiyənin Müdafiə naziri Fikri İşıq Kocaelidə qeyri-hökumət təşkilatları ilə görüşündə deyib.

Onun sözlərinə görə, heç bir ölkə bölgədə Türkiyə ilə müzakirə aparmadan addım ata bilməz:

“Türkiyə bölgədə tarixin yenidən yazıldığı bir mərhələdən keçir. Bu mərhələdə heç kim bölgədə Türkiyəni hesaba almadan hərəkət edə bilməz.

Birinci məqsədimiz ölkəmizin sabitliyi və təhlükəsizliyidir. Buna görə Əl Bab əməliyyatları keçirilir. Azad Suriya Ordusu ilə orada Türkiyəyə istiqamətli təhdidləri zərərsizləşdirmək üçün mübarizə aparırıq. Ölkəmizin təhlükəsizliyini qorumaq üçün başqa hərbi əməliyyatlara da heç çəkinmədən başlaya bilərik.

Məqsədimiz Türkiyəyə qarşı təhdid haradan gəlirsə-gəlsin, mənbəyini yox etməkdir”.

Xatırladaq ki, Rusiya Prezidenti Vladimir Putin dünən keçirilən mətbuat konfransında Kürdüstan dövlətinin yaradılması məsləsinə toxunub. Kreml rəhbəri bunun İraqın daxili işi olduğunu deyib:

“Kürd hərbi bölmələri terrorizmlə cəsarətlə və effektiv mübarizə aparırlar. Kürdlərin müstəqilliyinə gəldikdə isə onlar beynəlxalq hüquq çərçivəsində hərəkət etməlidirlər. Biz İraqın daxili işlərinə müdaxilə etməyi planlaşdırmırıq”.