ABŞ prezidenti Obama Əfqanıstandakı ABŞ hərbiçilərinin sayını bu qış 34 minə salacaqlarını açıqlayıb.

ABŞ tarixinin ən uzun sürən müharibəsini bitirəcəklərini bildirən Obama gələn il təhlükəsizliyin Əfqan hərbi qüvvələrinə veriləcəyini söyləyib.

"Axar.az"ın Türkiyə mətbuatına istinadən verdiyi xəbərə əsasən, prezident Obama 11 noyabr "Qazilər günü" ilə əlaqədar olaraq Arlinqton Milli Qəbiristanlığında təşkil edilən anım mərasimində iştirak edib. Naməlum Əsgər Mavzoleyinə çələng qoyan Obama mərasimdə iştirak edən xalqa səslənib.

ABŞ əsgərlərinin İraq və Əfqanıstanda keçirdiyi əməliyyatlardan fəxrlə bəhs edən Obama: "Əl-Qaidənin mərkəzi yox olmaqdadır. Xalqımız daha təhlükəsiz və vətənimiz daha güvəndədir",- deyib. İlk ABŞ Donanmasının 12 il əvvəl Əfqanıstana çatdığını qeyd eləyən Obama gələcək aylarda daha çox əsgərin evinə qayıdacağını bildirib.