Rusiya Prezidenti Vladimir Putin SSRİ-nin son prezidenti Mixail Qorbaçovu doğum günü münasibəti ilə təbrik edib.

Axar.az xəbər verir ki, bu barədə informasiyanı Rusiya prezidentinin mətbuat xidməti yayıb. Putin məktubunda Qorbaçova can sağlığı arzulayıb. O, Qorbaçovun uzun illər vacib ictimai fəaliyyətlə məşğul olduğunu xatırladıb.

Qeyd edək ki, Qorbaçov 20 Yanvar faciəsinin əsas günahkarı sayılır. Məhz onun əmri ilə sovet ordusu 20 yanvar 1990-cı ildə etiraz aksiyalarına son qoymaq üçün Bakıya yeridilib. Nəticədə 131 nəfər ordunun açdığı atəş nəticəsində həlak olub. Qorbaçov indiyə qədər 20 Yanvar faciəsində günahı olduğunu boynuna almır.