İçərisində beş nəfərin olduğu təcili tibbi yardım təyyarəsi qəzaya uğrayıb.

Axar.az xəbər verir ki, Hindistana məxsus təyyarə Tailandın paytaxtı Banqkok yaxınlığında alovlanaraq yerə düşüb.

Bu məlumatı Hindistan Xarici İşlər naziri Suşma Svaraj öz Tvitter səhifəsində paylaşıb.

Məlumata əsasən, hadisə nəticəsində təyyarənin pilotu dünyasını dəyişib, iki həkim isə ağır yaralanaraq Banqkok xəstəxanasına yerləşdirilib. Təyyarədə olan digər iki sərnişin isə xilas olub.

Qeyd edək ki, qəzaya uğrayan təcili tibbi yardım təyyarəsi paytaxt Delhi yaxınlığında yerləşən Qurqaondakı tibb mərkəzinə məxsusdur.