Tailandın şimalındakı Padaung qəbiləsinin qadınları uzun boyunlu olmaq üçün sözün əsl mənasında işgəncə görürlər.

"Axar.az" xəbər verir ki, Padaung qəbiləsinin qızları 5-6 yaşlarında olarkən boyunlarına dairəvi boyunbağı taxırlar. Yaş artdıqca boyuna taxılan halqaların da sayı artmağa başlayır. Və beləcə qızlar taxdıqları boyunbağılar sayəsində süni şəkildə boyunlarını uzatmış olurlar.

Əslində bu dairəvi halqalar boyunu uzatmır, çiyinləri aşağı itələyərək vücudun formasını dəyişir. Padaung qızlarının bunları taxması əlbətdə ki, səbəbsiz deyil. Bir çoxlarına görə, ilk bu cür boyunbağıları qadınlar qul ticarətçilərinə çirkin görünmləri üçün istifadə ediblər. Başqa bir məlumata görə isə, qadınlar bu boyunbağını pələng hücumuna və dişləməsinə qarşı taxırmış.

Səbəbin nə olmasından asılı olmayaraq, Padaung qızları milli adət-ənənələri ilə əlaqədar olan bu halqaları taxmaqdan qürur duyur. Hər bir padaunglu qadın həyatı boyu ən çox 23 halqa taxa bilir. Bu halqaların ümumi ağırlığı isə 12 kq-a qədərdir.

Padaung əyalətinin qadınları yatmaq üçün isə boyunlarını və halqalarını rahat qoyacaq xüsusi yastıqlardan istifadə edirlər.