ABŞ-da səfərdə olan Almaniya kansleri Angela Merkel Prezident Barak Obama ilə birgə Rusiyanı yeni sanksiyalarla hədələyiblər.

"Axar.az" xəbər verir ki, Ağ Evdə birgə mətbuat konfransı keçirən iki dövlət başçısı Rusiyanın Ukraynada destruktiv siyasətini davam etdirəcəyi təqdirdə sənaye və kənd təsərrüfatının müxtəlif sahələrində sanksiyalar tətbiq olunacağını bəyan ediblər:

"Bizim məqsədimiz Rusiyanı cəzalandırmaq deyil, Rusiyaya daha yaxşı seçim etməsi üçün stimul verməkdir", - Barak Obama deyib.

Angela Merkel isə hazırkı Ukrayna hakimiyyətini dəstəklədiyini və prezident seçkilərinin mayın 25-də baş tutması üçün əlindən gələni edəcəklərini bildirib.

Xatırladaq ki, bu gün səhər saatlarında Ukrayna təhlükəsizlik qüvvələri ölkənin şəqrindəki Slavyansk və Krematorsk şəhərlərində antiterror aksiyalarına başlayıb. Toqquşmalar nəticəsində azı 2 nəfərin öldürüldüyü təsdiqlənib. Rusiya hadisə ilə bağlı BMT Təhlükəsizlik Şurasının təcili iclasını çağırıb.