Quql şirkəti Avropa ölkələri sakinləri üçün sorğuya görə axtarış nəticələrindən istifadəçilərin şəxsi həyatına aid veb-səhifələri silməyə imkan verən yeni xidməti istifadəyə verməyi planlaşdırır.

Şirkət bu addımı Avropa Məhkəməsinin qəbul etdiyi qərarla bağlı atmağa məcbur olub. Belə ki, məhkəmənin qərarına əsasən, sorğuya görə köhnəlmiş və ya qeyri-aktual məlumatlara istinadlar serverlərdən silinməlidir.

Financial Times nəşrinə müsahibədə Quql-un icraçı direktoru Larri Peyc şirkətin Avropa İttifaqının ali məhkəmə instansiyasının qərarını yerinə yetirəcəyini deyərək xəbərdarlıq edib ki, bu, innovasiyalara ziyan vura və söz azadlığını boğan rejimlərə sərf edə bilər.

Qeyd edək ki, bir müddət əvvəl Quql Avropa Məhkəməsinin çıxardığı qərardan təəssüfləndiyini bildirib. Şirkət və əksər hüquqşünaslar hesab edirlər ki, qüvvədə olan Avropa qanunvericiliyinə görə, bu qanun yalnız tam olmayan və ya səhv informasiyaya şamil edilir./Milli.az/