Ukrayna təyyarəsini raketlə vurmağa çalışan Luqansk terrorçuları inzibati binaya zərər vurub.

Terrorçular tərəfindən tutulmuş vilayət dövlət administrasiyasının binasının yanında yerləşən inzibati binada partlayış baş verib.

Hadisə şahidlərinin sözlərinə görə, binada və yaxındakı evlərdə partlayış dalğasından pəncərələr və şüşələr sınıb.

Hazırda hadisə yerində həkimlər işləyirlər. Yanğınsöndürənlər tərəfindən yanğının söndürülməsinə cəhd edilir.

"Təyyarəni güllələyirdilər, amma inzibati binaya düşdülər", - deyə sosial şəbəkədə şahidlərdən biri yazıb.

Şahidlərin məlumatına görə, mərmi Luqansk inzibati binasının 4-cü mərtəbəsinə düşüb. Hadisə şahidinin mətbuata verdiyi açıqlamada mərminin ya Luqansk vilayət şurasının sədrinin kabinetinə və ya qəbul otağına düşdüyü bildirilir.

Terrorçuluğa qarşı əməliyyat mərkəzının mətbuat katibi Vladislav Seleznyovun fikrincə, "Luqansk inzibati binasında partlayış odlu silahla və partlayıcı maddələrlə bacarıqsız davranışdan irəli gəlib" /ANS/.