Almaniyada yaşayan tanınmış və istedadlı rəssam Azər Vəlinin Markbreit şəhərində rəsm sərgisi keçirilib.

Bu haqda Axar.az-a danışan rəssam həmin günü həyatının ən gözəl sərgisi adlandırıb:

"Bu gün həyatımın ən gözəl sərgisi oldu. Təşkilatçıların dediyinə görə, Markbreit şəhərinə ən azı 20-25 min arası insan gəlib. Sərgimə isə bu gün 5000-dən çox insanın gəldi, onlardan 1000 nəfəri əl işlərimi çox bəyəndi. 500 nəfər insan isə bioqrafiyamı oxuyanda Azərbaycan sözünü təəccüblənərək elə bərkdən səsləndirdi ki, elə bil, əfqanların yenidən Budda heykəli düzəltməyə başladığını gördülər".

Azər Vəli sərginin ticari yekunuyla bağlı zarafatla bunları deyib:

"Hardasa 100 nəfər insan qiymətlərlə maraqlandı, sonda isə bircə nəfər də əl işlərimdən almadı. Həyatımda heç vaxt belə bir sərgim olmamışdı. Günah özümdə oldu. Qiymətləri alman tanışımın məsləhəti ilə Pikassosayağı qoymuşdum - bahalı. Bəlkə də işlərimdən ayrılmaq istəmədiyimə görə…"

Rəssam bütövlükdə sərgidən çox razı qaldığını gizlətməyib:

"Ancaq cox gözəl bir gün oldu. Bu qədər insanın işlərimə baxandan sonra sevgi dolu və təşəkkür ifadə edən baxışlarından sonra yaşamağa və yaratmaga dəyər".