İspaniyada 39 ildir oturduğu taxtdan imtina edən kral Xuan Karlosun istefasından sonra cümhuriyyətçilər referendum keçirilməsi tələbi ilə aksiyalara başlayıb.

Axar.az xəbər verir ki, Madrid, Barselona, Valensiya, Zaragoza, Alikante, Sevilya, Bilbao, Salamanka, Burqos kimi bir çox şəhərlərdə meydanları dolduran respublikaçılar kral Xuan Karlosdan sonra ölkədə monarxiyanın sona çatmasının vacibliyini bildirərək referendum keçirilməsini tələb edib.

Paytaxt Madridin məşhur Sol Meydanını dolduran minlərlə adam respublika bayraqları dalğalandıraraq, "İspaniya, sabah respublika olacaq" şüarı səsləndiriblər. Aksiyaçılar yeni kral olacaq Felipeyə müraciətlə "Felipe, çıx get" deyə qışqıraraq, ispanların bundan sonra referenduma gedərək gələcəklərinə qərar verməsi lazım olduğunu tələb edib.

Bundan başqa Paris, Berlin, Brüssel, Porto kimi Avropanın müxtəlif şəhərlərində də İspaniyadakı monarxiya əleyhdarları aksiya keçiriblər.