Rusiya hərbi təyyarəsi beynəlxalq sularda ABŞ kəşfiyyat təyyarəsini təqib edib.

Axar.az xəbər verir ki, Rusiyanın Su-27 qırıcı təyyarəsinin Oxot dənizində ABŞ kəşfiyyat təyyarəsini təqib etməsi məlumatını ABŞ Müdafiə Nazirliyi yayıb.

Ukrayna böhranı səbəbiylə əlaqələri korlanmaq dərəcəsinə gələn ABŞ və Rusiya bu dəfə Rusiyanın Oxot dənizində qarşı-qarşıya gəlib.

Pentaqon sözçüsü Stiv Varren ölkəsinə məxsus Boinq RC-135U tipi kəşfiyyat təyyarəsinə Rusiya hərbi təyyarəsinin 30 metrə qədər yaxınlaşdığını söyləyib.

Varren rus pilotun daha sonra təyyarəsində silah olduğunu ABŞ təyyarəsinə göstərmək üçün manevr etdiyini də bildirib.

Xatırladaq ki, bu ilin aprel ayında da bənzər bir hadisə Qara dənizdə baş vermişdi. Rusiya hərbi təyyarələri ABŞ donanmasına məxsus hərbi gəmilərin üzərindən alçaq məsafədən uçuş reallaşdırmışdı.