Ukraynanın 4-cü prezidenti Viktor Yanukoviç və Ukrayna Təhlükəsizlik Xidmətinin, Müdafiə Nazirliyinin keçmiş əməkdaşları Rusiyaya gizli məlumatlar ötürüblər.

Axar.az xəbər verir ki, bu barədə Ukrayna Daxili İşlər nazirinin müşaviri Anton Qeraşenko 5-ci kanala verdiyi açıqlamasında deyib.

"Bizim iki keçmiş nazirimiz hazırda Rusiyadadır. Onlar bütün gizli məlumatları satıblar. Daha sonra Ukrayna Təhlükəsizlik Xidmətinin iki keçmiş rəisi və xarici kəşfiyyat xidmətinin keçmiş rəhbəri Qriqoriy İlyaşov da Rusiyadadır. Hələ üstəlik, keçmiş prezident Viktor Yanukoviç də oradadır. Rusiya Ukrayna ordusunun bütün maddi və mənəvi vəziyyətini bütünlüklə öyrənib", - deyə Qeraşenko bildirib.

Nazir müşavirinin sözlərinə görə, Ukrayna belə bir münaqişəyə hazır deyildi: "Bu, hibrid müharibəsidir. Rusiya öz qoşunlarını yeritmir, amma Yanukoviç ailəsi və digər rus fondları tərəfindən maliyyələşdirilən dəstələrini, muzdlularını Ukraynaya döyüşməyə göndərir".