Dnepropetrovsk vilayəti qubernatorunun səlahiyyətlərini icra edən İqor Kolomoyski Rusiya ilə sərhəddəki boşluqların aradan qaldırılması üçün Finlandiya təcrübəsinin tətbiqini vacib bilib.

Axar.az xəbər verir ki, o yalnız bu variantla Rusiya tərəfdən terrorçuların girişinin qarşısı alına biləcəyini deyib. Ölkənin Ali Baş Komandanı Pyotr Poroşenkoya müraciət edən Kolomoyski təcili şəkildə Luqansk, Donbas və Xarkov vilayətləri ərazisində Rusiya ilə sərhədə Finlandiya variantının tətbiqinin tezləşdirilməsini istəyib.

Qubernatorun hazırladığı layihə artıq Prezident Aparatına təqdim olunub. Kolomoyski deyib ki, sakit, sülhsevər Finlandiyanı Stalindən "Mannergeym xətti" adlı sərhəd forması qorudu:

"Bu cür formadan Ukrayna da yararlanmalıdır ki, Putinin hücumlarından qorunmaq mümkün olsun. İsrail də bu təcrübədən istifadə edir və terrorçuların qarşısının alınmasında effektli rol oynayır".

Xatırladaq ki, fotoda təsvir olunan sərhəd forması unikal hazırlanma mexanizminə malikdir. 5-6 ay ərzində sırf möhkəm dəmirdən iynəli zolaqlar hazırlanır. Bu, o qədər möhkəm olur ki, ağır hərbi maşın, tank belə keçə bilmir. Layihənin maliyyə xərcləri də hesablanıb. Belə ki, Rusiya ilə 1920 km-lik sərhəd xətti Ukrayna büdcəsinə 100 milyon avroya başa gələcək.