Cənubi Qafqazın Türkiyə vasitəsilə Avropa ilə logistik əlaqələr qurması regional siyasətdə çox şeyi dəyişə bilər.

Axar.az xəbər verir ki, bu sözləri erməni mətbuatı Türkiyənin Bakı-Tiflis-Qars dəmiryolu vasitəsilə Qafqazla birləşməsinin siyasi nəticələri haqda yazıb.

“Türkiyənin Osmanlı imperiyasının çökməsindən və respublikanın formalaşmasından sonrakı 100 il ərzində Cənubi Qafqazla yeganə əlaqəsi Qars-Gümrü dəmiryolu vasitəsilə olub. 1993-cü ildə Kəlbəcərin işğalından sonra isə həmin yolun istifadəsi dayandırılıb. Azərbaycan və Gürcüstanla hələ də dəmiryolu əlaqəsi olmayan Türkiyə, Qafqazdan tamamilə təcrid olunmuşdu. Türkiyə daha sonra dəmiryolu logistikasını dəyişib. Asiya və Avropanı birləşdirən dəmir yolunun açılışı, Qarsdan Ərzuruma və daha sonra İstanbula qədər dəmiryolların tikintisi tamamlanıb. Bununla da 2013-cü ildən Türkiyə öz məhsullarının birbaşa olaraq Böyük Britaniyaya çıxışını təmin edib.

Ermənistanla Gürcüstan arasında dəmiryolu əlaqəsi mövcuddur. Bu, Bakı-Qars dəmiryolunun istifadəsindən sonra Cənubi Qafqazdan, o cümlədən Ermənistandan olan yüklərin Londona çatması deməkdir”, - erməni mediası qeyd edib.

Erməni mətbuatı həmçinin Bakı-Tiflis-Qars dəmiryolu vasitəsilə erməni yüklərinin daşınmasının qadağan olunması üçün heç bir mexanizm olmadığını, dəmiryolunun istifadəsinin Türkiyənin Qafqazla birləşməsinə və regional siyasətdə bir çox dəyişikliklərin yaranmasına səbəb olacağını yazıb.