Bu gün Türkiyə Cümhuriyyətinin banisi Mustafa Kamal Atatürkün anım günüdür. Ölümünün 79-cu ildönümü münasibəti ilə Atatürkün nadir fotoları nümayiş etdirilib.

Axar.az xəbər verir ki, Türkiyə Baş Qərargahının Əsgəri Tarix və Strateji ETÜD dairəsi arxivlərindən 25 foto və bəzi sənədlər 10 noyabr Atatürkü anım günü münasibəti ilə “Anadolu” agentliyi vasitəsilə paylaşılıb.

Fotolarda Mustafa Kamal Atatürkün Türkiyənin müxtəlif bölgələrində səfərləri və gündəlik həyatından bəzi görüntülər əks olunub.

Xatırladaq ki, Atatürk 10 noyabr 1938-ci il saat 09:05-də tutulduğu sirroz xəstəliyindən İstanbulda Dolmabaxça sarayında vəfat edib. Cənazəsi 21 noyabr 1938-ci ildə müvəqqəti olaraq Ankara Etnoqrafiya Muzeyində dəfn edilib, mavzoleyi tikildikdən sonra 10 noyabr 1953-cü ildə oraya köçürülüb.