İstefa verdiyini elan edən Livanın Baş naziri Saad Hariri öz iradəsi ilə Səudiyyə Ərəbistanında qalır və istədiyi zaman ölkəni tərk edə bilər.

Axar.az xəbər verir ki, bunu Səudiyyə Ərəbistanının xarici işlər naziri Adil Cübeyr fransalı həmkarı Jan-İv Le Drian ilə Ər-Riyadda keçirdikləri birgə mətbuat konfransında bildirib.

Xatırladaq ki, Livanın Baş naziri noyabrın 3-də Səudiyyə Ərəbistanına səfərə gedib və orada gözlənilmədən postundan istefa verdiyini elan edib. Baş nazir istefasının əsas səbəbi kimi xarici ölkələrin, həmçinin onlarla əlbir olan Hizbullah qruplaşmasının Livanın daxili işlərinə qarışmasını göstərib. Eyni zamanda vurğulayıb ki, həyatı təhlükə altındadır.

Noyabrın 14-də isə Saad Hariri özünün Tvitter səhifəsində Səudiyyə Ərəbistanında könüllü qaldığını və yaxın günlərdə Beyruta qayıdacağını yazıb.

Livan Prezidenti Mişel Avn Saad Haririnin şənbə günü öz ailəsi ilə birlikdə Parisə gedəcəyini bildirib. Baş nazir bir neçə gün orada qaldıqdan sonra Beyruta qayıdacaq.