Kolumbiyada 610 min dollar pulu daşıyan karqo təyyarəsi silahlı şəxslər tərəfindən qaçırılıb.

Axar.az xəbər verir ki, bu barədə Kolumbiya Mülki Aviasiya İdarəsindən informasiya verilib.

Məlumata görə, “AeroGalan” nəqliyyat şirkətinə aid Cessna Piper PA34 tipli kiçik karqo təyyarəsi Cesar bölgəsində Akvaçika hava limanına eniş etdikdən sonra hücuma məruz qalıb. Hadisədən sonra hava limanı nəqliyyatın hərəkətinə bağlanılıb.

Hazırda heyət üzvləri ilə birlikdə qaçırılan təyyarənin yerinin müəyyənləşdirilməsi istiqamətində iş aparılır.

Qeyd edək ki, Kolumbiya mətbuatında təyyarəni qaçıran şəxslərin Milli Qurtuluş Ordusu üzvləri olması barədə xəbər yayılıb.