Keçmiş Fələstin hökuməti Səhiyyə Nazirliyinin sözçüsü Əşrəf əl-Kudra verdiyi açıqlamada dünən səhər saatlarından bu yana Rifah şəhərinə təşkil edilən hücumlarda 40 adamın öldüyünü, 400 adamın yaralandığını açıqlayıb.

Axar.az xəbər verir ki, sözçü yerli özünümüdafiə qrupları tərəfindən İsrail ordusunun sərhəd bölgələrində atəşkəs elan edildiyi vaxtda 30 adamın cəsədinin də ərazidən çıxarıldığını bildirib.

Əşrəf Əl-Kudra İsrailin hücumlarının başladığı iyulun 7-dən bu yana ölənlərin sayının 1500-ü keçdiyini, 8600 adamın yaralandığını qeyd edib.

Xatırladaq ki, BMT Baş katibi Pan Ki Mun və ABŞ dövlət katibi Con Kerrinin dünən gecə verdiyi ortaq açıqlamada İsraillə Həmas arasında üçgünlük atəşkəs elan edildiyi açıqlanmış Həmas da səhər 10:00-dan başlayan 72 saatlıq "atəşkəsi" qəbul etmişdi. Lakin, İsrail ordusu atəşkəs elan olunandan 2 saat sonra Rifah şəhərinin şərqinə topla hücum edərək razılaşmanı pozub.