Qəzzada atəşkəsin uzadılması istiqamətində bu vaxta qədər fələstinli qruplaşmalar və İsrail arasında razılıq təmin edilə bilinmədi.

Axar.az xəbər verir ki, Qəzzada razılaşdırılan 72 saatlıq atəşkəs bu gün 10:00-da bitib. "Röyter" Xəbər Agentliyinin şahidlərin fikirlərinə istinadən verdiyi məlumata görə, atəşkəs müddəti bitər-bitməz İsrail Qəzzaya havadan hücumu edib. Ölən və yaralananlar haqqında məlumat yoxdur.

Digər tərəfdən HƏMAS təşkilatı İsrail ordusunun fələstinli qruplaşmaların atəşkəs razılığını pozduğu iddiasını da inkar edib. HƏMAS sözçüsü Sami Əbu-Zuhri bunu İsrail tərəfindən hücum etmək üçün bəhanə olduğunu bildirib.

Xatırladaq ki, İsrailin embarqo altında saxladığı Qəzzaya iyulun 7-də başlatdığı "qoruyucu xətt" adlı əməliyyatda 432-si uşaq, 243-ü qadın olmaqla 1886 adam həlak olub, 2979-u uşaq, 1903-ü qadın olmaqla 9806 nəfər yaralanıb.