İŞİD-ə qarşı beynəlxalq koalisiyanın hədəfi Suriyada terrorçuları məhv etmək yox, regionda öz mövcudluğunu gücləndirmək idi.

Axar.az xəbər verir ki, bunu Moskva Beynəlxalq Təhlükəsizlik Konfransında çıxışı zamanı Rusiya Müdafiə naziri Sergey Şoyqu deyib.

“Güclü koalisiyanın terrorçularla bacarmamasına inanmaq çətindir. Hədəf tamam başqa idi. Onlar regiondakı situasiyanı qarışdırıb, burada hərbi və iqtisadi mövcudluqlarını gücləndirmək istəyirdilər. Suriyada vəziyyət Rusiyanın burada hərbi əməliyyatlara başlamasından sonra dəyişdi.

İŞİD artıq dünyanın başqa regionlarına qaçmağa başlayıb. Onların Afrikada aktivliyi artır, üstəlik, cihadçılar Asiya və Avropaya qayıdır. Bütün dünyada ekstremist və separatçı hərəkatlar üçün sərfəli mühit yaranır”, – deyə o bildirib.

Şoyqu NATO-nun Rusiyaya təhdidindən də danışıb:

“ABŞ və NATO Rusiya sərhədlərində 10 minlik hücum qrupu saxlayır. Bunlar Polşa və Baltikyanıda yerləşdiriliblər. Alyansın təlimləri artıb, ABŞ-ın donanmasının Qara və Baltik dənizindəki fəaliyyəti aktivləşib”.