ABŞ prezidenti Barak Obama İraqda Baş nazir vəzifəsinə namizəd və yeni hökuməti qurmaq tapşırığı alan Abadini təbrik edib.

Axar.az xəbər verir ki, prezident Obama Heydər əl-Abadi ilə telefon danışığında ən qısa müddətdə bütün iraqlıları təmsil edən hökumət qurmağı tövsiyə edib.

Onun fikrincə, prezident Fuad Masumun Abadiyə belə bir tapşırıq verməsi fərqli cəmiyyətlərin bir araya gətirilərək yeni bir hökumətin qurulmasında əhəmiyyətli olduğunu qeyd edib.

Maliki bacarmadı…

Bu arada ABŞ Müdafiə naziri Çak Heygel də Abadini təbrik edib. O təbrikində siyasi böhranın aradan qaldırılmasında Baş nazir Nuri əl-Malikinin müvəffəqiyyətsiz olduğunu deyib.

Avstraliya-ABŞ Müdafiə və Xarici İşlər nazirlərinin müşavirəsinə (AUSMIN) qatılan Pentaqon rəhbəri Avstraliya Müdafiə naziri David Conston ilə Sidney şəhərində təşkil olunan mətbuat konfransında İraqdakı vəziyyəti şərh edərkən belə deyib.

Xatırladaq ki, İraq prezidenti Fuad Masum Malikinin etirazlarına baxmayaraq, yeni hökumətin təşkili vəzifəsini Heydər əl-Abadiyə verib. Maliki bunun konstitusiyaya zidd olduğunu bildirib.