NATO-nun Baş katibi Anders Foq Rasmussen Rusiyadan öz əsgərlərini Ukrayna sərhədindən çəkməyi tələb edib.

Axar.az xəbər verir ki, Rasmussen Rusiya qarşısında sərt tələb qoyub və bildirib ki, son 5 ildə NATO müdafiə xərclərini 20 faiz azaltsa da, Rusiya 50 faiz artırıb.

Sentyabrda vəzifə müddəti bitəcək Rasmussenin sözlərinə görə, rəsmi Kiyev separatçılarla dialoqa girməlidir:

"Rusiyanın bütün əsgərlərini Ukrayna sərhədindən çəkməsini tələb edirik. Rusiya separatçılara verdiyi silah, pul və canlı qüvvə dəstəyini dərhal dayandırmalıdır. Bundan sonra isə Kiyev hökuməti separatçılarla dialoqa başlamalıdır".

Baş katib onu da bildirib ki, hazırda Rusiya NATO-ya düşmən gözü ilə baxır: "Rusiya bizi qarşı tərəf kimi qiymətləndirir. Hadisələrin inkişafından asılı olmayaraq hazır olmalıyıq. Ola bilər ki, təşkilatın növbəti yığıncağında müttəfiq dövlətlərin təhlükəsizliyinin təmin olunması üçün yeni plan hazırlayaq".

Rasmussenin sözlərinə görə, Avropa ölkələri hərbi xərcləri artırmalıdır:

"NATO ölkələri pillə-pillə müdafiə xərclərinin artırmalıdır. Buna ehtiyac var. Hər şeyi ABŞ-a yükləmək doğru deyil. Xərclərin üçdə ikisini ABŞ qarşılayır".