Ukrayna prezidenti Petro Poroşenkonun böyük oğlu, 29 yaşlı Aleksey Poroşenko ölkənin cənub-şərqində - anti-terror əməliyyatı zonasında xidmət edir.

Musavat.com-un Ukrayna qaynaqlarına istinadən verdiyi xəbərə görə, Vinnitsk Vilayət Sovetinin deputatı olan Aleksey 3 aylıq oğlunu, xanımı Yuliyanı evdə qoyaraq gizli şəkildə döyüşə gedib.

Məlumatlara görə, 4 həftə öncə o hərbi xidmətə çağırış vərəqəsi alıb. "Mümkündür ki, döyüşçülər arasında o, başqa ad-soyadla tanınır", - deyə informasiyada bildirilir.

Anti-terror əməliyyatının rəhbəri Yuriy Tandit xəbəri təsdiqləyib. Onun sözlərinə görə, Aleksey Poroşenko özünü sadə, pafossuz aparır. Maraqlıdır ki, prezidentin özü oğlunun hərbi xidmətdə olması barədə heç yerdə heç nə deməyib.

Qeyd edək ki, parlamentin spikeri Aleksandr Turçinovun 21 yaşlı oğlu Kirilə, müdafiə naziri Valeri Geletayın böyük oğlu Aleksandra da bildiriş gəlib. Daxili işlər naziri Arsen Avakovun 25 yaşlı oğlu Aleksandr isə "Kiyev 1" batalyonunda qulluq edir.