Qəzza sektorunda kütləvi toqquşmaların baş verdiyi zaman ərzində HƏMAS lideri İsmayıl Haniyə Qahirədən göndərilən xüsusi vertolyotla Misirə uçub.

Axar.az xəbər verir ki, bu barədə informasiyanı “İsrail a Yom” qəzeti yayıb. Haniyənin mayın 14-də Misirin Ümumi Kəşfiyyat Xidmətinin rəisi general Abbas Kamal tərəfindən Misirə çağırıldığını bildirilib.

Qahirəyə gələn Haniyə ilə Kamal arasında danışıqlar sərt formada keçib. Əvvəlcə HƏMAS liderini onunla görüşü gözləməyə məcbur edən Kamal daha sonra onun üzərinə qışqırıb. Bundan sonra o, sərt formada Qəzza sektorundakı etirazların dərhal dayandırılmasını tələb edib.

Misir kəşfiyyatının rəhbəri Haniyəyə etirazların dayanmayacağı təqdirdə İsrailin HƏMAS liderlərinin məhvinə başlayacağını və Qahirənin buna heç bir reaksiya verməyəcəyini deyib.

Qəzet Abbas Kamalın olaya yalnız İsraillə danışıqlardan sonra müdaxilə etdiyini bildirib. Belə ki, İsrail tərəfi danışıqlar zamanı HƏMAS-a güzəştə getməyəcəyini deyib. İtkilərin çoxalması və daha sonra bölgədə anarxiyanın yaranaraq, bunun Misir ərazisinə keçməsindən qorxan Misir kəşfiyyatının rəhbəri Haniyəni Qahirəyə çağırıb.