Gürcüstanın keçmiş prezidenti Mixail Saakaşvili Rusiyanın Ukraynaya hərbi müdaxilə etdiyini və hazırda elan olunmamış müharibə getdiyini bildirib.

Axar.az UNİAN-a istinadən xəbər verir ki, Saakaşvili bu barədə özünün Feysbuk səhifəsində yazıb.

"İndi mən Kiyevdə ukraynalı bacı-qardaşlarımla öz təcrübələrimi bölüşürəm. Yüzlərlə rus tankı, zirehli texnika və "Qrad" sistemləri dövlət sərhədini keçir və kənd və şəhərlərə hücum edir", - Saakaşvili yazıb.

Saakaşvilinin sözlərinə görə, rusların etdiyi hərəkəti separatçı konflikt, terror hücumu və ya əks-hücum (Ukrayna Rusiya ərazisinə hücum etməyib) adlandırmaq düzgün deyil. O, bunu birbaşa hərbi müdaxilə və müharibə adlandırıb və dünya ictimaiyyətini hər şeyi öz adı ilə çağırmağa səsləyib: "Niyə görə beynəlxalq ictimaiyyət hər şeyi öz adı ilə çağırmasın? Mən fikirləşirəm ki, indi bizim regionda başa buzlu su tökməkdən də vacib proseslər gedir. Ukraynanın, Gürcüstanın və Rusiyanın digər qonşularının taleyi Donetsk, Luqansk və Mariupolda təhlükə altındadır. Yaşasın Ukrayna!"