Liviyada müvəqqəti Baş nazir Abdullah əs-Səni məclisə hökumətin istefasını təqdim edib.

Axar.az xəbər verir ki, verilən açıqlamada hökumətin buraxıldığını, yaxın vaxtlarda məclisin yeni hökumət quracağı qeyd olunub:

"Hökumət konstitusiyaya əsaslanaraq istefasını məclisə təqdim edib. Yaxın zamanlarda məclis Liviya xalqının bütün təbəqələrini təmsil edəcək, təhlükəsizlik və sabitlik arzuları ilə yeni hökuməti təşkil edəcək".

İstefa səbəbinə gəlincə, hökumət paytaxt Tripolidə meydana gələn qarşıdurmaları əsas gətirib.

Xatırladaq ki, təxminən 1 aydır ki, Tripolidə hökumət qüvvələri ilə silahlı qruplar arasında qarşıdurmalar gedir. Silahlı qrupların hava limanı, bir neçə məktəb və digər əhəmiyyətli obyektləri ələ keçirdiyi qarşıdurmalar nəticəsində onlarla insan ölmüş, 8 mindən çox ailə evini tərk etməli olmuşdu.