Qondarma Luqansk Xalq Respublikasının tərəfində savaşan kazak qvardiyası kalmık könüllülərdən ibarət tarixi "Cunqar alayı"nı formalaşdırmaq və bərpa etməyi qərarlaşdırıblar.

Axar.az-ın Qazaxıstan mediasına istinadən xəbərinə görə, artıq bu istiqamətdə ilkin addımlar atılıb.

Verilən məlumatda deyilir ki, Şimali Qafqazda həyata keçirilən əməliyyatlarda xüsusi təyinatlılar qismində iştirak etmiş Kalmıkiya Muxtar Respublikasından olan könüllülər iki aydan çoxdur Ukraynanın şərqində separatçılara dəstək verirlər. Sözügedən məkandan növbəti dəstələr isə, Rusiya-Ukrayna sərhədini avqustun 25-də - separatçıların Ukrayna ordusuna qarşı əks-hücumu zamanı keçiblər. Hazırda 30–a yaxın etnik kalmıkin qaynar məkanlarda fəal vuruşması barədə faktlar ortadadır.

Xatırladaq ki, tarixdən "Cunqar-kalmık alayı"nın kommunistlərin tərəfində savaşması barədə yetərincə faktlar mövcuddur. Onlar 1920-ci ildə Krım yarımadasında Ağ qvardiyaya qarşı müqavimət göstəriblər. Bu arada sözügedən alayın adının bərpası Qazaxıstan media nümayəndələri və tarixçiləri tərəfindən narahatlıqla qarşılanıb. Tarixdən də məlumdur ki, iki əsirə yaxın müddətdə cunqarlar (kalmıklar) qazaxlara qarşı əsil soyğunçuluq həyata keçiriblər. Çinlilərin fitnəsi ilə qəsəbələr yandırılıb, talan edilib.