Bir qədər öncə Kiyev şəhər Şurasının iclasında Radikal Partiyanın lideri Oleq Lyaşkoya yaxınlığı ilə seçilən "Azov" batalyonunun keçmiş üzvü İqor Mosiyçukla Ukrayna paytaxtının meri Vitali Kliçko arasında gərgin anlar yaşanıb.

Axar.az-ın Rusiya mətbuatına istinadən xəbərinə görə, keçmiş döyüşçü Kliçkonu nalayiq ifadələrlə təhqir edərək, onu döymək istəyib.

Qeyd edək ki, gərginliyə səbəb Kliçkonun Mosiyçukun iclasının gündəliyinin dəyişdirilməsi ilə bağlı təklifini qəbul etməməsidir. Kliçkonun aşağıdakı sözləri qarşı tərəfi özündən çıxarıb:

"Baxıram, kimlərsə iclasa hərbi formada gəlib, sanki ön cəbhədən təşrif buyurub".

Bu sözlərdən sonra oturduğu yerdən duran Mosiyçuk iriəliyə şığıyıb və şəhər merinin ünvanına nalayiq ifadələr işlədib. Yalnız yaxınlıqdakı deputatların sayəsində onun cəhdlərinin qarşısının alınması mümkün olub. İclasın işinə fasilə verilib.

Xatırladaq ki, Ukraynada bu cür hadisələr adi hal sayılır, ölkə parlamentində düşən əlbəyaxa davalar isə bu məkanı əsl döyüş meydanına çevirir.

​