NATO-nun Uels sammiti başa çatdıqdan sonra Amerika prezidenti Barak Obama dünyadakı ən məşhur arxeoloji abidələrdən biri olan Stounhencə ekskursiyaya yollanıb.

Axar.az RİA Novosti-yə istinadən xəbər verir ki, abidənin rəhbəri Keyt Deyvis (Kate Davies) Amerika prezidentinə özü bələdçilik edib və Obamanın gəlişinin "çox əhəmiyyətli" olduğunu söyləyib:

"Mən hələ də insanları həyəcanlanmağa və heyrətlənməyə davam edən bu unikal memarlıq abidəsini ABŞ prezidentinə göstərmək imkanını böyük bir imtiyaz hesab edirəm".

Ekskursiya başa çatdıqdan sonra Obama qeyd edib ki, məşhur abidəni ziyarət etmək onun ömrü boyunca gerçəkləşdirmək istədiyi arzular siyahısında olub.

Qeyd edək ki, Stounhenc Londondan 130 km cənub-qərbdə yerləşən meqalit (iri daşlardan düzəldilmiş qədim tikintilər - qəbirlər) tikilidir. Abidə 1986-cı ildə UNESCO-nun Ümumdünya irsi siyahısına daxil edilib.