Bəzi ekspert və siyasətçilərin "Ukrayna Qərb üçün çox vacib dövlətdir" kimi fikirlərinə baxmayaraq, ukraynalılar avropalı və amerikalıların onların köməyinə tələsəcəyinə və bütün problemləri onların əvəzinə həll edəcəklərinə yalandan bel bağlamamalıdırlar.

Axar.az bildirir ki, bu fikirləri "Forbes"in siyasi icmalçısı Mark Adomanis səsləndirib.

"Qərbin sonrakı taleyi heç də birbaşa Ukraynadan asılı deyil. Avropa da, Ukrayna da əsrlər boyunca bir-birilərindən asılı olmayaraq inkişaf etmişlər" - deyən icmalçının fikrincə, ötən yarım ildə nəyinsə dəyişdiyini ehtimal etmək düzgün olmazdı.

Mark Adomanis öz məqaləsində Amerika tarixçisi, Yel universitetinin professoru Timoni Snayderin "Ukrayna Qərb üçün çox vacib bir dövlətdir" – fikrini şərh edərək yazır:

"Alimin dəlilləri təəccüb doğurur, çünki az qala üç yüz ilə yaxın bir müddətdə Kiyev nəinki Moskvanın təsiri altında olmuş, üstəlik siyasi və iqtisadi baxımdan ona tabe olmuşdur. Bütün bu müddət ərzində Ukrayna heç müstəqil dövlət də deyildi".

"Bəlkə də Qərb Ukraynaya iqtisadi və humanitar yardım göstərməlidir. Ancaq bu ölkədə böhranı aradan qaldırmağa cəhd edərkən ifrata varılmamalıdır. Ukraynalılar avropalı və amerikalıların onların köməyinə tələsəcəyinə və bütün problemləri onların əvəzinə həll edəcəklərinə yalandan bel bağlamamalıdırlar" – deyə icmalçı fikirlərinə yekun vurub.