Qırğızıstanın keçmiş baş naziri Feliks Kulovun lideri olduğu "Ar-Namus" fraksiyası ölkəsinin adının dəyişdirilməsi də daxil olmaqla, bir neçə vacib məsələnin 2015-ci ildə referenduma çıxarılmasını təklif edib.

Axar.az-ın Radiotochka.kz saytına istinadən verdiyi xəbərə görə, o, ölkəsinin adındakı "stan" sonluğunun digər ölkələrin əhalisinin böyük bir kəsimində gerilik əlaməti kimi anlaşıldığını dilə gətirib.

Kulov deyib ki, partiyasının gənclər qanadı Qırğızıstanın hazırkı Konstitusiyasının tez bir zamanda dəyişdirilməsini istəsələr də, təşkilatın digər fəalları bu addımın indi atılmasını tələskənlik kimi qiymətləndiriblər.

Qeyd edək ki, partiya lideri Qırğızıstanın adının dəyişdirilməsi məsələsinə də toxunub:

"Önümüzdə iki variant var: Qırğız və ya Qırğızeli. Birinci variantda biz ölkəmizin qədim adına qayıtmış olardıq. Fikrimcə, ikinci variant daha uyğun seçimdir. Amma bütün hallarda hesab edirəm ki, biz ölkəmizin adındakı "stan" sonluğundan imtina etməliyik. Çünki bu, əksər ölkələrin əhalisində gerilik əlaməti kimi anlaşılır".

Xatırladaq ki, bir müddət öncə Qazaxıstan Prezidenti Nursultan Nazarbayev də ölkəsinin adının "Qazaxeli" ilə dəyişdirilməsi təklifi ilə çıxış etmişdi.