Ostap Benderin "Qərb bizi xilas edəcək" sarkazmı Ukrayna siyasətində növbəti təsdiqləyici sillə oldu. Tortun ən yağlı tikəsini Putinə yedirən Qərb indi "konfet satan" Poroşenko ilə avrointeqrasiya yolunda demokratik, parçalanmış, Krımsız Ukraynanın "cəfasını" çəkməkdədir. Bəs, Putinin əzələ nümayişi qarşısında qoca Avropa hansı yolu seçəcək?

Cığal uşaqlar kimi "vuraram haa" təhdidi üslubunda Kremli iqtisadi sanksiyalarla qorxutmağa çalışan Vaşinqtonun səyləri quru bəyanatlardan o yana keçmir.

Axar.az xəbər verir ki, bu günlərdə yuxarıda qeyd olunan proseslərə toxunan Avstriyanın "Kleine Zeitung" qəzeti "Rusiya Avropaya lazımdırmı?" başlığı altında manşet atıb. Məqalədə deyilir ki, Putinin əsas strateji məqsədi heç də Ukraynaya qarşı yox, birbaşa NATO–nun reputasiyasının dağılması istiqamətinə yönəlib. Təhlil xarakterli yazıda qeyd olunur ki, Putin Krımı ilhaq etməklə, Ukrayna sərhədlərinə ordu yığmaqla və düşünülmüş şəkildə separatçıları silahlandırmaqla Qərbin reaksiyasını yoxladı. Və bu nəbz yoxlaması Moskvanın istəkləri şəklində cərəyan elədi.

İndi hər şey sanksiyalardan asılıdır. Amma və lakin sanksiyalar Rusiyanı silkələyə bilməsə, Şərqi Avropa Qırmızı Ordu ilə üzbəüz qala bilər. Çünki Rusiya Şərqi Avropada hökmranlıq etməyə iddialıdır. Üstəlik, Rusiyanın Avropa üçün əvəzedilməz xammal ixracatçısı, əsas qaz təminatçısı olması sanksiyalar məsələsini sadəcə gündəmdə saxlayır. Əgər Rusiya Avropaya gedən qazın qaykalarını bağlasa, qoca qitənin əhalisi qışda donacaq.