Mədəniyyət və turizm proqramında iştirak etmək üçün Rusiyadan ABŞ-a yollanmış 15 uşaq geri qayıtmayıb.

Axar.az RİA Novosti-yə istinadən bildirir ki, bu barədə Rusiyanın uşaq haqları üzrə səlahiyyətlisi Pavel Astaxov "Rossiyskaya qazeta"ya verdiyi müsahibədə məlumat verib. Pavel Astaxovun sözlərinə görə, artıq ilk dəfə deyil ki, uşaqları məbəniyyət, reabilitasiya, turist proqramları çərçivəsində ABŞ-a aparır və heç bir qeydiyyat olmadan, hər hansı bir status vermədən Amerika ailələrində saxlayırlar.

Moskvadakı ABŞ səfiri Con Tefft isə bildirib ki, Rusiya hökuməti ölkə məktəblilərinin FLEX proqramında iştirakının ləğvi qərarı haqqında diplomatik missiyaya məlumat verib. Halbuku bu proqram sayəsində onlar heç bir ödəniş etmədən Amerika ailələrində yaşaya və təhsillərini davam etdirə bilərdilər. Rusiya Elm və Təhsil Nazirliyi və uşaq haqları üzrə səlahiyyətli nümayəndə izah ediblər ki, FLEX çərçivəsində ABŞ-a getmiş şagirdlərdən yalnız birinə rəsmi şəkildə qəyyumluq müəyyənləşdirilib. Rusiya XİN ombudsmanı Konstantin Dolqov isə deyib ki, Rusiya ABŞ-la əməkdaşlığı davam etdirməyə hazırdır, amma Rusiyanın qanunlarına riayət etmək şərtilə.