Dünya şöhrətli aktrisa Sofi Loren eşq sirlərini bütün
dünyaya açıqlayıb.
80 yaşını qeyd edən italyan aktrisası Sofi Loren həmişə olduğu
kimi, bu gün də məlahətli və füsunkardır. Dünyanın demək olar ki,
bütün kino mükafatlarına layiq görülmüş aktrisanın iştirak etdiyi
ən yaxşı filmlər "Dünən, bu gün, sabah", "İtalyansayağı nikah" və
"Çoçara" hesab olunur.
Bu günlərdə Milanda Karl və Maurisio Rikkardilərin fotosərgiləri
açılıb. Sərgidə Sofi Lorenin də həyatının ən müxtəlif anları əks
olunmuş fotolar yer alıb. Loren həmçinin pərəstişkarlarını "Dünən,
bu gün, sabah – mənim həyatım" kitabı ilə də sevindirib. Kitabda
aktrisa özünün gizli romanlarından və məşhur kişilərlə
macəralarından bəhs açır.
Kitab Sofinin Frenk Sinatr, Marçello Mastroyani və Keri Qrantla
münasibətlərinə işıq salacaq. Odri Hepbernlə dostluğa isə ayrıca
fəsil həsr edilib. Kitabda Keri Qrantla aktrisa arasında çəkiliş
meydançasındaca alovlanan həyəcanlı məhəbbətdən də söz açılır.
Bundan başqa, xanımın şəxsi arxivində saxlanılan bəzi lentlər də
ilk dəfə işıq üzü görüb. Kitabın prezentasiya mərasimi Romada
italyan dilində baş tutub. İngilis versiyasını isə yalnız dekabrda
izləmək mümkün olacaq.
Xatırladaq ki, Sofi Lorenin əsl adı – Sofiya Villani
Şikolonedir. O 20 sentyabr 1934-cü ildə Romada anadan olub, 16
yaşından kinoda çəkilməyə başlayıb. 1953-cü ildə özündən təxminən
20 yaş böyük olan həyat yoldaşı Karl Pontinin təklifilə "Loren"
soyadını götürüb. Aktrisanın iştirak etdiyi son film 2010-cu ildə
ekranlara çıxıb.