Beynəlxalq Qırmızı Xaç Komitəsi əməkdaşının Donbas regionunda həlak olması səbəbindən Ukraynanın bütün ərazisində fəaliyyətini bir neçə günlük dayandırıb.

Musavat.com-un məlumatına görə, bu barədə Komitənin rəsmisi bildirib.

"Biz əməliyyat fəaliyyətimizi bir neçə günlük dayandırdıq. Bizim üçün hazırda ən əsas məsələlər - Donetskdə olan nümayəndələrimizin təhlükəsizliyini və həlak olan əməkdaşımızın cənazəsinin İsveçrədəki ailəsinə tez bir zamanda çatdırılmasını təmin etməkdir", - deyə Qırmızı Xaç Komitəsinin rəsmisi bildirib.

Komitənin əməkdaşı, 38 yaşlı İsveçrə vətəndaşı Loran Etyen dü Paskye oktyabrın 2-də Donetsk mərkəzinin atəşə tutulması nəticəsində həlak olmuşdu. Rəsmi Kiyev baş vermiş hadisədə Rusiya yönümlu qüvvələri ittiham edib.